中華廠商聯合會噚晚請新聞界春茗，照舊一定有靚茅台招呼大家。
八方見到新會長獅球嘜洪克協，當然要恭喜佢，廠商會喺選委會有十二個位，但係仲未決定點樣產生。席中，有位馮元侃老先生話當年，副會長尹德勝嘅老父尹致中發現工展會中李嘉誠嘅展品有抄襲外國貨之嫌，身為監察人嘅佢於是派人去西環查察，到咗一個只有兩個舖位嘅廠房，下晝七點幾啲工人放晒工，只有個人喺度執拾碎膠，用嚟聽日再用，嗰個人正係今日城中首富誠哥，件事最後點收科老人家冇講，只係話事後超人冇嬲尹家，大家仲互相幫忙。
「李嘉誠嗰陣好有人情味，𠵱家個仔澤鉅只係睇錢；以前好易搵到超人，𠵱家就秘書重重搵佢唔到。」尹副會長好歎息咁講。莫非人富貴咗就變？
傳真︰2623-9278
電郵︰[email protected]