社會科學題︰香港有邊個行頭嘅產品係蜚聲國際？吓？乜本地貨都會渴市嗎？梗係，如果唔係，香港會展點會每年搞咁多大型國際展覽，如玩具展、家品展等。不過最能代表港人嘅，都唔係呢啲行業，原來去到外地，當啲鬼佬知道你係香港人，可能會用「HongKongJackieChan？」嚟回應，「功夫」先係我哋嘅生招牌。請不要再過份崇外，香港，還有許多屬於你我嘅驕傲。
記者︰劉昱蘭 攝影︰陳偉強
武打片
享譽全球
芸芸MadeinHongKong產品中，蜚聲國際功夫片絕對能令港人自豪。50、60年代已有古裝武打片和關德興主演嘅《黃飛鴻》系列，但第一套進軍荷李活嘅電影，卻是靠1973年邵氏出品嘅《天下第一拳》（羅烈主演），當時連續數星期躋身美國票房十大，最高攀升至第三位。後來嘉禾才把紅得發紫嘅李小龍推向西方市場，造就李小龍神話，後來還有成龍、洪金寶、袁和平等。
以為個個係成龍
影評人吳昊表示香港帶起嘅功夫狂熱歷久不衰。「喺非洲，你仲可以喺戲院睇到李小龍嘅《猛龍過江》，嗰度有好多截拳道武館，會用到『乜乜Li』嚟命名。先進國家如丹麥、荷蘭等，啲人通常會問我識唔識功夫，以為香港人個個係JackieChan。」
就因為香港功夫片掂，現時嘅動作西片，都喜歡用港人製作班底做武指、剪接，如《廿二世紀殺人網絡》起用袁和平，哥倫比亞仲畀錢周星馳拍《功夫》，就知功夫片的確有國際市場。
功夫片悲痛史
港產功夫片並非一帆風順，《天下第一拳》在美國勁收後幾個月後，全球便慢慢停止功夫片嘅播映，一來認為此類影片拳腳交加，經常將人打至傷亡太殘忍；二來因保護主義，唔想功夫片繼續保持強勢。加上李小龍於1973年去世，此時無人敢再開拍功夫片。直至80年代，功夫片要變種（如加入笑料、槍戰等）才可生存。
鐘錶
高質創新
odm 日本回流
唔少明星潮人都戴嘅港產品牌odm，先攻日本市場，進佔日本大型百貨公司Loft，造起個勢先返香港大展拳腳，重可以打入歐美各國如法國、新加坡等地，香港做到咁大brand嘅手錶，真係只此一家。
Twemco 天文台專用
成日會喺唔少機構見到嘅呢款鐘，就係港產Twemco，屬香港鐘錶界大阿哥，有30年歷史。睇香港天文台有咁多牌子嘅鐘唔用而要用Twemco，就證明佢真係準得犀利。
公仔
創神話
Gardener風魔日本仔
雖然日本和美國figure公仔做得出神入化，但當MichaelLau嘅12"Gardener一出，兩地玩具迷即趨之若鶩。Nike搵佢創作嘅人物Mr.Shoe（Sample），連同100款波鞋figure，以不同造型登場。《東京暴族》日本原作者井上三太，又同佢搞GardenerSquareFigure，風頭一時無兩。
手工精細
日本仔對figure要求好高，但日本老牌玩具雜誌《Figure王》，都曾與港產鐵人兄弟合作，推出限量版figure，就係鍾意佢哋對玩具設計有heart，推出嘅product夠detail。
土炮家品
創意無限
倫敦設計博物館收藏
前香港設計師協會會長AlanYip，擅長設計電子家品，唔單止要諗個樣，零件方面又限制多多，特別有難度，但佢一樣做得好出色，仲有國際地位。
趣致家品
好多人都鍾意city'super嘅精品，古靈精怪成日都好有驚喜，芸芸眾多入口貨中，其實都有本地自家品牌，TAPAS就係其中一個。
香港品牌
不老之謎
120年歷史的李錦記、近70年歷史的奇華餅家、57年歷史的生力啤……香港其實都有不少有地位的「好香港」自家品牌，大家一點也不察覺它們的真實年齡，「人靠衣裝」，要年輕當然要執執個樣和不斷創新啦。
李錦記突破傳統
李錦記有個廣告好深刻︰爸爸仔仔等開飯，媽媽拎住支唧唧醬油出廳，成碟餸菜由支醬油唧出，個仔睇見嚇到連人帶椅跌落地下。就係咁識反傳統，棄用玻璃樽的土氣，先會令人覺得好fresh，點都唔覺佢年過一百。
生啤攻陷年輕人
生力啤不停變革，1997年在罐上印有出廠日期，列明新鮮度，連啤酒都做到跟鮮奶一樣，幾夠膽。1998年生力啤酒流線型樽裝面世，用到今時今日，包裝young好多。2001年狂出精品，重有代言公仔Sammy仔、明sell年輕人的wilddayout音樂會、仲試過crossover《無間道》出宣傳品㖭。
不再老餅
奇華真夠潮，月餅盒敢用黑色底的「皇帝頭像」，原來係奇華立心反傳統，找G.O.D.老闆楊志超設計呢個大突破，之後銷路節節上升。近來又找來著名地道香港畫家阿虫來畫禮盒包裝，sell地道情懷，更成為外國人必買手信。
