側田校酒：側田校PacoFormula　冧女掂硬

側田校酒：側田校PacoFormula　冧女掂硬

側田好鍾意蒲吧，以前喺美國會蒲，嚟到香港一樣無吧不歡。聽佢講蒲吧有四大好處，可以同朋友一齊jam歌、識校酒、學做DJ和搵作曲靈感。仲有唔夠一個月就要開個唱，見佢頻頻撲撲錄音兼做宣傳，可能連練歌都唔夠時間，幸好佢一向有落吧happyhour，咁就可以乘機同班音樂友jam吓歌，keep住個水準。

記者：曾靜茵　攝影：周旭文、黃子偉
MakeuponJustin：DeborahVaughan
WardrobeonJustin：CIRCLES
場地提供：MOOCH（25218001）
Imagegirl：Yankee、Irene　鳴謝：芝華士

去吧愛jam歌

「平時去開酒吧，我最鍾意就係好即興衝出去同班livebandjam歌，通常去開嗰間都會有識得嘅音樂朋友喺度，成班人一齊玩吓jam吓就最開心。」講jam歌當然就難唔倒佢啦，原來校酒佢都一樣掂，仲唯恐冇人信佢識，即刻變身bartender整咗兩杯cocktail，一杯仲用自己個名，命名ChivasJ。唔好睇佢雞手鴨腳，做出嚟又似模似樣。

單手調酒！
■呢杯cocktail有芝華士、咖啡酒、花生酒等。

■哎呀！唔記得落朱古力粉！

■ChivasBrules　有橙汁、白色可可酒及橙酒，酒味濃，味道帶點酸。$98

■Chivaslychee　加入荔枝甜酒、青檸汁、熱情果糖水及綠茶，酒味唔濃，女仔最啱飲。$98

PacoFormula

側田記得Paco曾經教佢溝過一隻酒，幾易入口。

■４月份的兩場演唱會，門票在開售兩小時內被掃清。

溝法好簡單，首先就係落大量碎冰，然後倒三分一芝華士再加三分二梳打水即成。

靚女試飲
好怕飲梳打水嘅Irene都話呢杯酒幾易入口，夠凍酒味又唔濃。

落吧夢想做DJ

若側田唔做歌星，佢最想做乜？答案當然離不開音樂。「其實我一直都好想做DJ，除咗覺得好玩外，仲可以透過唔同嘅音樂帶起成個場嘅氣氛，當你企喺個DJStation入面，唔係話自己想播咩歌就播咩歌，仲要留意場內嘅人啲情緒，而最先決嘅條件當然係你要好熟歌曲嘅類型。我曾跟一個朋友學打碟，但當中要顧好多唔同嘅嘢，最難就係歌與歌之間嘅接駁位要接得好。」

教你玩吧Game

無骰盅、無啤牌落吧可以玩啲乜，側田就即場教我哋玩番幾個喺美國玩嘅遊戲，一個就係將銀仔彈枱入杯，呢個game難就唔難，側田示範5次都有1次中，不過擺明係呃酒飲嘅game多啲喎！

Game1：彈銀仔入杯

■先要用兩隻手指攞住個銀仔，秘訣在於平放咁擲落枱，咁先可以容易彈得起，邊個擲唔中就算輸。

Game2：單手玩圍枚

■玩時每次都係單對單，試玩第一鋪，側田就輸咗畀modelIrene，認真失威。

作首蒲吧歌

十幾歲就移民美國嘅側田，仲喺嗰邊工作過一段時間，除每星期跟班同事去酒吧聯誼外，當然唔少得同班兄弟去蒲吓玩吓。問到可唔可以教番讀者幾下冧女絕招，佢就即刻耍手擰頭：「我同班兄弟落吧都好少追女仔，通常都係成班friend摸吓酒杯底傾吓偈！」咁純情，真唔真呀？仲話嚟緊會作首歌講兄弟情。「佢哋成日催我寫一首講兄弟情嘅歌，講吓我嘅當年落吓吧、打吓交呀咁，點樣共度起跌，但我仲未開始寫。」

最愛霍景良

演唱會月尾就會開show，但目前都只係出過一隻碟，相信班fans都期待緊新碟推出，所以我哋就叫側田設計一個新嘅唱片封套，話晒叫做讀設計出身，側田即時用佢嘅無限創意，失驚無神彈出個《創世紀》嘅角色──霍景良。
「我一向都好鍾意霍景良呢個角色，覺得佢夠奸夠狗，其實飾演霍景良嘅郭峰，係一個被忽略嘅演員，應該可以攞到好多獎項，如果可以，我嚟緊仲想搵佢幫我咪嘴拍MV，咁就正啦！」

■相信帽經已變成側田嘅標記，單單喺帽上寫上J便是側田。

■音樂人通常都要有創意，就即場考考側田，睇吓佢有無創作力先。

■郭峰飾演嘅霍景良，原來係側田偶像。