我到今日都堅持，我係一個好鍾意音樂嘅人，唔係生意人，𠵱家就真係學緊做生意（搞上海菜館）。當年環球整個環境容許我發揮到做音樂人，我簽Juno（麥浚龍）純粹係覺得佢可以有得做，唔係因為佢有一個有錢老竇（中建電訊老闆麥紹棠）。你睇娛樂圈有幾多個紅嘅，係屋企有錢㗎！有錢唔紅嘅就多到不得了，證明屋企有錢係冇幫助嘅，再講佢屋企有冇錢唔關我事。
不過佢老竇真係有幫輕錄音同埋廣告費，但我想簽佢嘅時候，都唔知佢老竇係邊個，到真係決定簽時，先知佢老竇有咁大間公司，之後傳媒對Juno有好多不必要嘅攻擊，成為見報最多嘅新人。講真我都承擔唔起咁多風波，但係洗濕咗個頭，惟有撐到底。
同麥紹棠嗌交
我同Juno嘅關係好close，我對佢嚟講，既係老細又係長輩，以佢嘅年紀，佢對屋企、對公司之間嘅平衡處理得好好。佢老竇的確係愛子心切，否則成件事會再靚啲，谷咁多嘢得返嚟嘅係好多負面嘅嘢。佢老竇對我好好，我唔敢講有冇壓力，我係好懂得做藝人嘅人，我唔希望有投資者、或者喺經濟上support到我嘅人教我做音樂，我同佢老竇嗌交，多數都係為咗Juno。
以有錢仔嚟講，真係要讚一讚Juno，佢真係任勞任怨。當時咁多負面新聞，我不停鼓勵佢，佢真係非同小可，承受能力好強，嗰陣話佢做歌星係畀錢買返嚟，我同佢講，呢個圈就係咁，但我簽得你，就一定會打到落尾。當日喺GrandHyatt，佢第一次請我食晏，我同佢講，爭獎嘅嘢，爭到唔好驕傲，爭唔到唔好賴我。
嗰年新人攞獎，Juno其實攞得唔理想，𠵱家Juno冇咁多新聞，但係最難攞嘅商台叱咤佢都有歌，證明做歌星真係要畀時間淋花、種植，揠苗助長係冇用嘅，同傳媒做咁多嘢做乜呀？好好哋做歌星咪攞咗囉，我見佢攞獎好開心。但我唔明，點解佢攞咗獎仲要咁低調？真係唔明白。
「蕭正楠去咗邊？」
我誇口講句，當年Juno係輸咗畀蕭正楠，但三年後嘅今日，蕭正楠去咗邊？但Juno仲喺度。冇吃過苦頭嘅，將來唔會係巨星，愈一帆風順愈快冇，一跌落嚟就起唔到身，反而受過教訓嘅，會識珍惜機會，欣賞旁邊做嘢嘅人。我當年幫Juno定起碼三年嘅project，如果唔得，起碼心服口服。
Juno將來紅唔紅到好難講，因為到目前為止，暫時未試過家庭式做法捧人係得嘅，我未見過，我wish佢goodluck啦，我一直非常投入地覺得佢會得，唔理佢係咪我嘅人。樣？香港有幾多男歌星真係靚仔㗎？
口述：陳少寶 撰文：張止寒
此欄逢星期六刊出
陳少寶（小寶）：曾是商台名DJ，先後擔任新藝寶、寶麗金唱片公司高層，一手捧紅王菲、Beyond，並曾和張國榮、許冠傑等巨星合作，九九年加入環球唱片任總裁，○三年離開，現為陳苑淇經理人。
