日股散246點，港股跌80點，唔算差。下晝3點8個字，滙控（005）成132.60元，跟住唔知邊度嚟嘅賣盤約有5球貨（值6億幾銀），佔全日成交兩成幾，最低掟到132元，收132.10元，全日唔見0.80元。係春江鴨、指數基金抑或對沖基金做嘢，好快揭盅。滙控係龍係蛇，下周一收市後就清楚。
神華C輪9573：神華（1088）大發神威，由12.10元踢到12.75元，4日內升幅達14%。神華參與投資河北煤炭碼頭項目，又有大行推介。但咁升法似乎過熱，因住獲利回吐。
最神威嘅神華C輪係9573，收1.68元，升幅38%。各輪中，仍以9573數據最靚，5月中到期，負溢價1.5%，槓桿率7.6倍。賭神華C輪，呢隻最啱；問題係，正股急升後驚住調整，數據靚唔等於應該買。
大唐C輪9635：大唐發電（991）冇郁，但隻C輪9635則大升33%，收18仙，有1.3球金額易手。隻輪6月初夠鐘，行使價6.18元（正股做緊5.60元），溢價13.6%，槓桿率31.1倍（有效10.1倍），引伸波幅32.2%。以咁嘅條件上車，好易撞車，視而不見可也。
昨日有5隻新C輪上市，3隻同港股無關，佢哋同佳能（即係日本Canon）、日立（即係Hitachi）及日鐵（即係NipponSteel）掛鈎，全日交投欠奉。冇乜人識嘅東西，掛牌盞嘥氣。奉勸發行商，無謂畀幾皮銀両過港交所（388）同證監會使。
章盛