即將上映的韓片《我和我的女友》，條橋明抄日本悲情片《在世界中心呼喚愛》，照道理Sell得絕症應該係谷淚彈先啱。但一見到已屆麻甩之齡的車太鉉，為咗扮中學生而剪個搞笑Bob頭，加埋個儍氣樣，即刻令人諗起《我的野蠻女友》個儍仔牽牛，同樣係純情戇男，表情多多，笑料百出。勢估唔到新片集合咗《在世界中心呼喚愛》和《我的野蠻女友》的元素，用笑料包裝絕症片，條橋Work唔Work？
記者︰劉昱蘭
車太鉉麻甩扮口靚仔 相似度：80%
鬥造型！
《世中》同埋《我和我的女友》都係學生「純愛」的電影，成日都着住套校服，問邊個有睇頭啲，就真係見仁見智。
宋慧喬贏身材 相似度：75%
女角一樣野蠻 相似度：75%
記得全智賢喺《我的野蠻女友》入面，點到車太鉉陀陀轉，又要佢着高踭鞋，瘀事做盡。今次宋慧喬都唔執輸，搞到車太鉉一身蟻先至安樂。
野蠻1︰屈你做阿四
喬妹第一次遇見車太鉉，就無端端叫車太鉉迫入人群中搶買炸肉餅。嘩？三唔識七做乜要幫你？喬妹話個原因係︰「冇得解喎」。咁以車太鉉一貫的儍頭儍腦性格，就緊係死死地氣、迫到隻嘢咁入去買畀佢囉。
野蠻2︰請你撻生魚
喬妹明知柔道肥佬鍾意自己，當肥佬捉住車太鉉，問喬妹係咪同佢拍緊拖，喬妹重唔利用大好機會答一句︰「係吖」，車太鉉即時俾人撻一鑊甘。
照抄《世中》絕症劇情 相似度：95%
《我和我的女友》係加咗好多搞笑枝節，但基本上成個劇情同《世中》冇乜分別。梗係啦，《世中》喺日本勁收6億5千萬港元喎，諗住照跟實冇死嘛。兩套戲都係校中靚女愛中其貌不揚的男同學，在一次二人世界的愉快旅途中，女孩患絕症病發入院，到最後男孩想帶女孩一同出走到世界中心，但命運使兩人未能如願，結果女孩還是敵不過病魔。
睇首映明星個個受
雖然係幾條舊橋炒埋一碟，不過你問睇過首映嘅明星，又真係個個都受噃。咁你都明點解絕症橋段、戇男男主角點解長拍長有啦。
李彩華︰
「睇完套戲，真係有想重返校園，搵返啲PuppyLove感覺。雖然韓片啲角色成日都有病，但今次算係笑中有淚。」
梁敏儀︰
「雖然個古仔好易估到劇情發展，但演員做得精采，尤其鍾意車太鉉表情豐富好搞笑。」
陳穎妍︰
「我覺得成個古仔幾慘情，但套戲冇《世中》咁Heavy，有一幕見到車太鉉阿爺，失驚無神喺棺材都彈出嚟，有笑位搞吓氣氛，睇得舒服啲。」
李浩林︰
「《世中》同埋《我》題材似冇所謂，大家個拍攝手法都唔同，《我》多咗段車太鉉阿爺的初戀故事，又有另一種感動。」
