行內人稱麥Sir嘅新聞處副處長麥國華今個月底榮休，結束佢三十八年嘅公僕生涯，噚日一眾行家老總採主喺中環蘇浙同鄉會餐廳同佢餞別，筵開三席。
大家問佢同啲行家交手咁耐最難忘係邊單新聞，佢話當年有單水塘標參案，佢係警察公共關係科發言人，記者向佢查詢單案係咪同某富商有關，佢去問個負責嘅鬼佬警司，得到嘅答案係完全冇關，於是佢照答，後來發現係假嘅，可能個警司唔想打草驚蛇，但係就害到麥Sir耿耿於懷，自責不應向記者說謊。
自此之後，如果唔肯定，佢寧願向記者講一大堆廢話，都唔講謊話。
八方聽到，大拍手掌。麥Sir敬業樂業，從冇托記者手踭，正式係幫得就幫，大小記者一視同仁，唔會大細超，做帶記者行街同做特首辦發言人，都一樣咁投入，唔怪得佢咁受歡迎嘅。
退休之後，麥Sir打算讀吓書、做吓義工，最大心願係學電子琴，八方都祝佢退休生活愉快，陪多啲老婆同四個仔（當中三個係三胞胎）。
傳真︰2623-9278
電郵︰[email protected]