亞視前藝員方剛前年在內地拍劇期間，聲稱被人非法扣押私人財物和身份證及護照，甚至一度遭恐嚇和敲詐，內地法院立案審理至今，一直沒有明確結果，是以方剛向全國政協汪明荃求助。
曾拍《豪門》、《銀狐》等劇的亞視前藝員方剛（現改名為方良剛），昨日聲稱前年在內地拍劇時遭人非法扣押身份證及護照，又遭恐嚇和勒索；雖然他曾向中聯辦、公安局、全國政協汪明荃甚至國家主席胡錦濤伸冤求助，但至今也未能把問題解決。
迫簽三十萬欠單
方剛昨接受訪問時說：「前年我喺北京拍電視劇《浪捲紅塵》，同劇組姓趙嘅女會計個丈夫、任職民盟中央社會服務部副部長郭先生租咗間屋，做宿舍兼寫字樓，點知後來發覺女會計造假賬，掌握咗劇組成百萬現金，所以劇組要求佢攞番啲錢出嚟。
「點知喺前年八月十一日，姓趙女人同佢姓郭丈夫，帶埋七個打手同兩個大廈保安衝上我哋宿舍，趕晒我同屋裏面嘅職演員出門口，扣起晒我哋所有證件、財物，又帶走部份劇集嘅母帶，一時要我畀百幾萬贖番啲嘢，一時要我簽三十萬欠單畀佢，我冇欠佢錢，做乜要簽欠單？跟住佢哋鎖咗間屋，叫我哋報公安，我哋咪報公安囉。
「我哋報公安，公安話呢單係經濟案，唔受理，第日我搵律師申請訴訟保全，等法院封查宿舍裏面嘅私人財物，諗住裏面啲財物喺法院手上，點都有個保障，點知相關部門又將個波踢來踢去，結果等到舊年二月五號先至可以執行呢個申請，畀番啲證件我哋，但裏面好多假賬嘅單據、現金同母帶都唔見晒！」
三度去信胡錦濤
方剛不忿地說：「呢件案目前重喺內地審緊，未有結果；但喺我嘅證件俾人非法扣押期間，我媽媽以為我喺內地犯案，搞到糖尿病引發併發症，舊年十一月過咗身。我曾經寫信畀內地好多單位，甚至寫過三封信畀胡錦濤反映件事，但都冇回音，後來我搵汪明荃，希望佢喺今次全國政協開會可以同香港人反映一吓，點解香港人喺內地做嘢會有咁多不公平對待。」記者昨日曾致電北京開會的阿姐，但一直聯絡不上。
採訪、攝影：林妃
