爆機狂迷：NDSLite到港炒上$2,480半日賣清

先兩日《蘋果》已極速報料，介紹比日本更早蒲頭嘅NDSLite靜靜雞登陸香港嘅情況，到日本發售前夕，更引嚟過千人通宵排隊等買機。香港前日終於到咗小量貨，雖照例炒起超過二千銀，不過有啲店舖20部來貨半日內已賣清。任天堂，的確有一手！
文：陳福榮
攝影：伍慶泉
ImageGirl：Salina

日機迷為佢排通宵

香港Game舖半日賣晒

外觀手感徹底改良

睇番出咗一年有多嘅NDS，最「蝕焯」係恍如玩具般嘅外表，成嚿大磚頭咁唔係個個頂得順。呢幾年iPodHit到爆燈，NDSLite亦向佢借鏡，變番個靚仔Look，學PSP咁攻潮人市場，線條圓潤體積細不在話下，機面仲包住層好薄嘅透明膠，唔似舊機咁「硬膠」！好多人對GBASP同NDS嗰種「扁撻撻」十字掣怨聲載道，新機從善如流，將十字掣同ABXY掣改到同GameBoyMicro咁凸起，如果Select、Start可以大粒番啲應該會更加好，𠲖家俾個大男人㩒好似硬係差少少Feel。

■包裝盒承繼咗NDS嘅美學觀，驟眼望落真係好鬼iPodFeel，唔再係玩具咁簡單！原價約$1,200

■Lite較NDS袖珍咗，比「黑掘掘」嘅PSP更顯時代感。

畫面超光猛

Lite最大改動係更強橫嘅畫面顯示，將NDS嘅亮度進一部提升，由半透明TFT改成全透明，加大FrontLight功率，令到佢無論烏燈黑火或光線充足都睇得清清楚楚。光度設四段調校，咁嚿電就襟玩啲，最長可達20粒鐘！
其餘變更較明顯係支筆個插位由機頂搬到右邊，好處係插喺機側冇咁易跌筆。另外個咪亦改為上下層之間連接位，而電源掣亦改成手提電腦所用嘅彈弓推桿，長推一陣先熄到機，咁就唔會好似NDS咁無厘頭㩒錯掣熄機啦。

■四段光暗絕對唔嘢少，谷盡後比舊機光猛得多。

■支筆改咗插右邊，而個咪就搬咗去中間連接位。

舊Game、連線通過測試

領教過PS2新一批機都出現兼容性問題，在下當然要試吓Lite嘅兼容度。結果隨便試玩幾隻Game，如《任天狗》、《應援團》同《孖寶賽車》等都照玩如儀，絕冇Hang機發生。喺WI-FI連線方面，亦同舊機夾得埋，以《孖寶賽車》實試，DownloadPlay速度同搵兩部舊機根本無分別，對戰亦唔會因為係新舊機而Lag，想換機嘅朋友可以放心。
相對嚟講就無咁照顧GBA呢Part。在下試過新舊Game甚至老翻GBA匣帶，都可插入Lite兼成功運行，但因插槽較淺，無可避免會凸餅帶出嚟，實在有礙觀瞻。幸好附送一個襯番色嘅GBA插槽防塵蓋。

■用Lite玩GBAGame會凸晒出嚟，或者係佢最輸蝕之處。

行貨未定價四月登場

由於頭批貨唔多，加上官方發表暫只推45萬部新機出市場，情況十足十喺三年前情人節面世嘅GBASP翻版，令到原本已經極為渴市嘅Lite更加多人搶。目前日本Game舖以超過四萬日圓賣緊二手未開封嘅Lite，升水足足倍半有多，Yahoo之類拍賣網站亦早已炒到兩萬幾三萬日圓，唔怪得㗎仔天未光都要捱凍瞓街排隊。暫時只知行貨4月推出，不過售價及機身顏色未定。

■海藍色同冰藍色延至3月11日喺日本推出。

主觀評價

好老實講，Lite一下子減到133.0×73.9×21.5mm，而重量亦由275g激降至218g，足足輕咗差唔多4，加上線條優美用色一流，對既有用家嚟講實在係最大吸引力。按鈕手感相當不俗，好似玩緊家用機咁款，不過由於經已習慣咗GBASP與NDS嘅薄掣，𠵱家換番厚掣衝擊反而唔算好大。全透明TFT屏幕簡直正斗，雖無法同PSP相比，不過已將NDS嘅不足完全克服。但Lite嘅最大問題都係貨源嚴重不足，導致短期內售價必然高企，日圓低水依然賣接近兩千，可見有錢都未必能輕易將之取到手。唔好話正常滙率，就算賣十算照睇都要等多一陣先有機會，有心等嘅不妨畀啲耐性。

銅鑼灣試反應

講咗咁耐部機有幾正，得在下一個講好似唔係好公道，索性踩落銅鑼灣旺區，搵幾個機迷試玩吓，睇睇大家又有咩評價？

售賣點：DreamStore（25753285）
地址：灣仔東方188商場G04、256號舖

阿瓜（16歲）學生
唔覺重手，外形幾好又夠光，但如果喇叭可以大聲啲就好咯。

Celia（17歲）學生
簡約但略嫌單調，整番啲色水就啱晒我玩；下芒好似唔夠光。

阿輝（29歲）運輸
二千蚊唔算貴喇！畫面幾光不過唔夠聲。

Maru（28歲）廚師
機身顏色我最Like，不過咁貴，遲啲先買。