尖沙嘴九龍站四大屋苑擎天半島、漾日居、君臨天下、凱旋門，連同隔籬嘅港景峯共五個樓盤，喺二月份一共錄得五十三宗二手成交，佔全港同期二手住宅成交百分之一，不過，總值就有五億，佔超過四個巴仙，反映呢五個盤好重磅，平均每個賣九百四十幾萬。
同一月份比較，呢五大屋苑嘅成交量同總值都明顯增加，分別升咗二成六同五成二，跑贏整體二手住宅同期只係上升百分之八同一成，走勢凌厲。當中以只有一宗買賣嘅君臨天下，成交價同呎價分別係四千萬同萬八蚊，成為五十三宗成交裏面，銀碼最大兼呎價最高嘅單位。
成交量最多嘅係擎天半島，有二十一宗，佔四成。而就快入得伙嘅凱旋門，交投激增，由一月份六宗，飆升至二月份十四宗，多咗一點三倍，升幅最大。
最弱勢嘅係最先進駐九龍站嘅漾日居，𠵱家平均呎價六千二，係五盤中最低，比最貴嘅君臨天下低六成六，成交量更逆市下跌，比一月份減少一宗。
電郵地址：[email protected]