人大政協兩會今日起陸續展開，每逢呢啲敏感日子，北京氣氛都會緊張啲。就喺呢個時候，支聯會主席華叔噚日就用特快專遞，寄咗封請願信畀國家主席胡錦濤、總理溫家寶同人大委員長吳邦國，要求佢哋畀「六四」受難者家屬，有權公開悼念死去親人。
除咗六四之外，華叔都要求領導人，徹查廣東最近嘅鎮壓農民事件，同埋保障內地維權律師嘅權利。華叔都算樂觀囉，重喺封信嘅結尾，寫上「靜候佳音」四個字，但八方覺得，睇怕呢封信未去到領導人手上，早已經俾人截劫咗，唔好講話佳音，到最後肯定又係石沉大海。
傳真︰2623-9278
電郵︰[email protected]