寫字樓供應緊張，空置率一向低嘅尖沙嘴區，既冇乜新供應，東英大廈又要拆，租盤買少見少，業主趁機大幅加租。好在呢區租客同核心區中環嘅金融機構唔同，對寫字樓需求靈活性較大，唔想畀咁多租金，搬為上着，好似做聖誕卡同節日裝飾嘅Hallmark，聽聞提早成年就搵定地方。
Hallmark租開嘅港威大廈一期一、二座二十一樓三萬七千呎，最近九倉要加租，約市值三十五、六蚊呎，一個月就要百二、三萬，幾重皮。Hallmark有離意，左搵右搵，聽聞最近睇中紅磡海名軒低層寫字樓，貪佢租金相宜，準備年底約滿搬過去，呎租平一半有多，大約十四、五蚊，同廠區差唔多。
唔係有呢單租務，蘭西都唔知原來海名軒基座，已經轉咗做寫字樓。