班的士大佬前日圍住美利大廈慢駛，仲攔住條花園道，搞到中環交通大混亂，坐喺禮賓府嘅煲呔簡直嬲到拍枱拍櫈，反而冬冬就好老定，噚日着得靚靚去為環境保護委員會頒獎，中小企、建築承建商同物業管理都有得獎。
冬冬係環保出身，對交通運輸真係有啲束手無策，立法會交通事務委員會副主席鄭家富形容佢係鴕鳥，將個頭埋喺沙堆睇唔到就算數，咁最後咪爆大鑊，玩出火。啲的士大佬話冬冬唔見佢哋，其實佢新上場之時，都唔肯見啲議員，最後要驚動當時嘅政務司司長煲呔，先至有得見，而九鐵前行政總裁楊啟彥在位時，一樣食檸檬。
阿富話，冬冬後來知道民主派唔係想害佢，於是有偈傾，佢提冬冬，唔好對白牌車事件再掉以輕心，應該盡快拆彈，因為業界嘅要求唔係全冇道理。
至於啲的士司機，就好團結，八方問親佢哋，都係話冬冬無能，真係弊。
傳真︰2623-9278
電郵︰[email protected]