荷銀今年來港百年，特別多搞作，早兩日慶祝完第四間梵高理財中心新開張，跟手就推出100厘高息存款，高到咁，唔使華華講，一睇都知係花巧嘢啦！
據華華所知，要攞到百厘高息，首先閣下要有過百萬港元，事關呢個係該行梵高理財戶口嘅最低資產限制。另外，要投資指定產品，金額不少於60萬元（或同等幣值），就可以存入相等於投資金額或以下嘅款項（上限為1千萬），兼享百厘高息優惠，一日咁多。
唔好以為存一日就得，筆存款仲要自動續做3個月定期，先至算係滿足所有要求。以100萬存款計算，一日100厘息。利息有2740元，之後嗰三個月定期係牌價加1/4厘；以噚日牌價3.38厘計，三個月息有9075，加埋百日息拉番勻，年息就大約係4.73厘，都算好好。