踏入三月份，係各大小銀行公布業績高峯期，噚日就輪到渣打派成績表。渣打香港高層蘇利民、南凱英及馮隆春雖則準時到場，但佢哋只係負責答記者問題，發布業績工作就落喺集團倫敦嘅高層身上，而倫敦呢班「閒人」，結果一講就講咗接近一粒鐘。
身為答問代表，斷估都一早知道盤數係點，要呢班大賓卡齋坐一粒鐘喎，都咪話唔嘥料，亦幾悶。所以期間不時見到蘇利民左傾傾右講講，有時又玩吓手指，四圍望吓傳媒。不過華華見佢入場時大步大步咁行，唔似得喺中銀酒會嗰日跛跛吓，佢個膝頭哥睇怕都好得七七八八啦！
要揀最忠心高層，睇怕都係財務總監馮隆春，事關佢西裝筆挺，但右手就戴咗藍色綠色嘅渣打手帶，實行效法曾特首「飛龍」扣針不離身──以示忠貞。當一聽到集團主席BryanSanderson講到公司（香港）嘅稅前溢利升咗兩成，即時笑笑口，仲嫌面前個螢幕細得滯，索性側晒頭去睇個大螢幕。
既然盈利創新高，梗係要問下員工有冇得加人工及分花紅，蘇利民無正面回應，但華華就收到風，渣打員工喺2月尾已經收到花紅，大約係等同於一個月糧，到4月就會加人工，但幾多就唔知啦！
李華華