女子組合Cookies成員楊愛瑾（Miki）打算靠拍戲發圍，她謂很愛拍戲，每日都會睇影碟偷師，放假更會一日睇足五套戲。Miki還希望有機會與型仔偶像金城武結片緣。
組合Cookies由九個少女減剩四人，其後大家各有發展，算是最遲起步的楊愛瑾雖然未及隊員鄧麗欣（Stephy）和吳雨霏（Kary）那麼快出唱片，但她拍電影經驗較豐富，由《九個女仔一隻鬼》到最近的《至尊無賴》，演繹角色都不同。
靠打突圍
Miki將會花多些時間在電影方面，可能有機會與不同藝人合作，她說：「希望有機會同金城武合作，喺《如果．愛》入面，佢好有男人味、好型，而且好好戲，同埋好想同梁朝偉合作，但係呢啲似乎好遙遠，未必咁快有機會。女星方面，我好欣賞張曼玉同周迅，佢哋好叻又靚女。」
Miki希望今年拍武打戲，又想嘗試拍悲情戲，對電影充滿熱誠的Miki每天都會看電影，她說：「我日日都會喺屋企睇碟，乜嘢戲都睇，學吓嘢。就算放假，我都唔出街一日睇到五套戲。
容易抽離
「好似分一日三餐咁，早餐就睇紀錄片或者鬼片，晏啲就輕鬆少少，睇兩套笑片，同埋愛情片，跟住睇悲情片，喊吓都得，晚餐咪睇劇情片，可以思考吓嘛！」難怪Miki表示沒有時間拍拖，因為有時間都用來看電影。
很多演員拍戲後難抽離角色，年紀輕輕的Miki滿有信心表示不會遇上這個問題，她說：「可能我開朗啦，所以易抽離。拍緊戲我會好投入，好似拍《三更2之餃子》時，我盡量唔講嘢，壓抑自己情緒，就算唔使拍戲我都少出聲，營造情緒嘛！但係拍完就即刻唔諗啦，咁咪冇事囉！拍《龍咁威2之皇母娘娘呢？》咪會斯文啲，拍晒就即刻做番自己。」
採訪：王連連 攝影：陳俊強
髮型：VincePang＠ILColpo
