準傳媒大亨李澤楷檔now究竟有幾勁，睇吓佢對家有線盤數或已有體會。噚日K寶公布業績，收費電視一瓣有70幾萬客仔，但其實只係得幾個巴仙增長，而成盤大數仲大煲，加埋有3億咩遞延稅項至有5億幾，否則倒退700萬，話事人吳天海同埋新任財神關則豪仲解釋話係會計做法，但發生咩事都好明顯啦，好彩海哥一向深得記者心，否則肯定俾人𡁻到體無完膚。
咁點睇今年競爭呢？海哥話，now係一個好強勁的對手，新電視呢？面世兩年都睇唔到有咩影響，但佢拍埋now之後係點就未知，總之海哥幾堅持K寶唔會減價，只會做好內容云云，另外仲會搵吓有乜發財機會，如合拍埋啲韓國佬搞吓GAME咁……總之一句講晒生意難做囉！
講番now，小小超寄望好高，諗住做到中文CNBC格局的財經台，據聞響20號開台，仲想搵只準自己養錦鯉不準百姓養雞的煲呔做主禮嘉賓，二少要話畀大家知，咩先叫做有頭有面！
傳真︰2623-9278
電郵︰[email protected]