好多基金揸住嘅領匯，成日都俾人傳會將佢拆骨，原因係大家想對佢嘅管理層施壓。領匯嘅高層成為眾矢之的，唔知係咪壓力大，所以有高層唔做。噚日領匯宣布，梁定邦（圖）辭去領匯獨立非執行董事、披露委員會同提名委員會成員嘅職位，仲喺今個月一號正式生效。公布中話，梁定邦唔撈純粹個人理由，同董事會無意見分歧。
講起領匯嘅人事問題可謂一疋布咁長，領匯仲未上市時，首任主席係王冬勝，後來佢由於要過檔滙豐銀行，滙豐係保蔫人之一有利益衝突，所以辭任；其後鄭明訓坐咗佢個位，點知因為德意志增持領匯，而鄭主席又唔提醒大家佢係德銀嘅亞太區資深顧問，搞到滿城風雨。不過，鄭主席都算硬淨，寧願唔續任德銀顧問，繼續坐任領匯主席個位；梁定邦忽然唔玩，唔通又利益衝突，定係揸咗好多？