鄭大班永遠招風招雨，佢撐特首係人都知，最近仲有人傳係佢喺度猛咁撥，話振英哥同曾鈺成「倒曾」，八方問大班，佢梗係唔認有咁做，話只係記者問佢答，佢仲話，振英哥同曾校長係煲呔接老董手再委任佢哋入行會，仲封振英哥做召集人，所以有理由相信佢兩人都係挺曾，否則唔會肯留低；而既然梁同曾應該係煲呔班底，冇理由反曾啦。
大班愈講，八方愈唔明，佢好似喺度提醒佢兩個唔好反曾多啲，講得咁小心同有政治技巧，因為怕講錯，弄巧成拙就害死煲呔。
大班後來又好玄妙咁講，佢贊成做議員唔可以為反而反，做反對派；但同時又唔應該做凡是派，所以佢唔肯加入策發會，又準備投票反對財政預算案，除非唐唐肯畀番十五億支援啲弱勢社群喇。
大班撐曾，話佢一定做得成下屆特首，至於唐唐，田少、吳光正同振英哥等，雖然想爭，未必成功喎。
傳真︰2623-9278
電郵︰[email protected]