星期二（二月二十八日）本欄講「政治正確」，幾位馬主朋友睇完打電話嚟，讚左丁山講得好，佢哋話感同身受，好想帶埋兒女到馬場參加賽馬，有機會就一齊影拉頭馬相。事實上，好多馬主知道自己隻馬有取勝機會之時，都會叫埋父母、太太、近親入馬場，成家人一齊影番張「威水相」，隻馬輸咗就冇得好講啦，真係贏咗嘅話，邊個唔想一家大細同享歡樂。唐英年今季頻頻贏馬，唐媽媽、唐太一定在場，相信佢都好想帶埋四個仔女入場也。即使係一般馬迷，如果有自由攜同子女入場，亦會高興。
馬主Ｌ知道吳嵩喺上個星期三（二月二十二日）叫埋老父、外母、太太等一齊到快活谷馬場，接受夏佳理主席頒獎，事實佢隻「富有心得」奪得快活谷挑戰盃錦標兼獎金六十五萬，馬主Ｌ話：「吳嵩領獎時，其實心裏諗住個仔。佢位公子只有十零歲，事前要求吳嵩帶佢入場，但吳嵩知道規矩，十八歲以下青少年唔准入馬場，於是吳公子孤零零獨自一人在家中牛咁眼吼住電視機轉播賽馬，希望睇到阿爺、阿爸、阿媽、阿婆等領獎！吳嵩就喺馬場掛住佢一人在家！」
馬主Ｌ曾翻查紀錄，發覺一九四○年之時，細路可以入馬場與父母一齊拉頭馬，香港現在唔准，其實係觀念大倒退咗，不如六十六年前咁開明。馬會其實怕咗政府甚麼都管，搞過一次賽馬家庭日之後，因有甚麼關注組嘈肥局長，馬會到現在都唔再辦家庭日。馬主Ｌ好懷疑啲甚麼關注組究竟有幾多人，有幾多代表性，如果政府真係咁怕關注組嘅話，馬主Ｌ叫左丁山同佢合作搞一個「馬場關注組」，要求政府准許十八歲以下青少年在賽馬日進入馬場，又搞一個「東南九（東南九龍）關注組」，要求在啟德機場興建郵輪碼頭與大型室內外運動場……左丁山話：「你講笑咩，你搵到三幾十個馬主支持，一啲都唔奇，但有乜代表性呀？」馬主Ｌ話：「車，香港有幾百個關注組，每個又代表幾多人呀！」