市建局上個月公布，用二十五億重建深水埗海壇街、桂林街同北河街三十七座舊樓，對區內舖市帶嚟支持，啱啱重錄得商舖極速摸貨㖭。
大南街一百四十號，地下連閣樓各約一千呎，炒家揸咗三日就摸出，作價九百七十萬，執到七十萬，個舖升值七點八個巴仙。
中原戴錦輝表示，舖位由手袋原料店以月租五萬四承租，計落回報仍有六厘七，唔算差。睇嚟分分鐘可炒多轉。
除咗呢單極速摸貨，同區南昌街一百三十九號地下舖位，八百五十呎，由投資者用一千零五十五萬買咗，呎價一萬二千四百幾；舖位連每月四萬四租約，租客係「蛇王業」，下個月「生約」生效時，租金會加到五萬三，回報就會升至約六厘。
戴錦輝話，深水埗區舖租平穩向上，以批發商嘅承租能力較強，所以能吸引投資者入市，喺盤源減少下，預期售價仲有得升。
電郵地址：[email protected]