豪食，講嘅唔一定係食物價錢，以前寫稿諗唔到點寫，總會搭一句鱔到爆嘅說話──「食景食裝修，胃口都好啲。」敷衍填字數，我手絕非寫我心，講真唔好玩喇，裝修唔食得落肚㗎！去過四季酒店「Caprice」法國餐廳，我先深切體會到豪華裝修真係可以引起食慾，環境靚，味蕾會跳動，對住碟大餸小嘅法國菜，會激發起食嘢嘅衝動。
記者：羅灝汶
攝影：何家亮
裝修糅合中國風
「Caprice」的意思是「妙想天開」，餐廳設計主題係1900-1910年代的巴黎，糅合中國風的法國裝潢由日本著名SpinStudio全權負責，一室香港著名設計師陳幼堅的藝術品，高級餐具有人手上色的J.LCoquet鍍金瓷具、法國名牌Ercuis刀叉，細眉細眼處一樣咁豪。廚師呢？餐廳主廚VincentThierry、糕點主廚LudovicDouteau、餐廳經理JeremyEvrard及品酒司CedricBilien係主力成員，個個大有來頭，尤其前者來自巴黎四季酒店「LeCinq」米芝蓮三星餐廳，與其他3位成員並肩作戰多年：「餐單會隨季節改變，食材差不多全部嚟自法國，我哋選取最新鮮最合時令嘅食材，最高級嘅法國鵝肝、最新鮮嘅士多啤梨，最（下刪N億字）……」講多無謂，試食最實際。
松露菌洋薊忌廉湯$150
名貴黑松露菌，配上洋薊，啖啖清香，賣相好似一杯咖啡，食落先知道，原來湯都可以咁好味。
鮮帶子韃靼配意大利芝士慕絲伴生蠔蜆肉多士$250
新鮮帶子配淡淡意國芝士，入口清新，生蠔蜆肉多士又香又脆，與慕絲出奇地合拍，一啖香脆、一啖鮮甜，好好味道。
脆煎鴨肝伴蘋果醬配些厘酒燴紅菜頭$395
鴨肝唔比鵝肝失色，呢度嘅鴨肝同樣係名貴法國貨，鴨肝比鵝肝更大塊，入味唔會太膩，加入蘋果醬令整道菜變得更清甜。
鱸魚柳伴法式燴洋薊、水欖、洋葱醬$350
法國人鍾意食鱸魚，加洋薊、水欖、洋葱醬即時令味道三級跳，魚柳香口之餘一點都不腥，每口都有魚肉清香。
咖啡巧克力撻配咖啡雪糕$130
Homemade雪糕加清甜朱古力，食完之後令人心情開朗，味道非常清新，還少了咖啡及朱古力的苦澀味呢。
有幾豪
Caprice（31968888）
地址：中環金融街8號四季酒店6樓
座位：120個
營業時間：12:00nn-2:30pm，6:00pm-100:30pm
