香港傳媒經常寫到迪士尼同海洋公園好似水溝油咁撈唔埋，據八方了解佢哋都不知幾老友鬼鬼就真，迪士尼都不知幾鍾意聘請海洋公園啲員工。
過去已聽聞部份演藝人員過去有喺海洋公園扮演過威威司令嘅角色，最新鮮滾熱辣就係海洋公園公關頭頭Glendy朱，都過檔到迪士尼。
佢哋公關部門都算做係迪士尼入面嘅揹鍋部門，外間無論迪士尼出咗咩嘢問題，傳媒永遠無法接觸佢哋嘅管理層，惟有依靠公關大哥大姐們，但係佢哋又要保住樂園嘅夢幻故事不能破滅，永遠欲言又止，答得唔湯唔水，不少傳媒都俾佢哋激到啤啤聲。
有前線員工曾經同八方講，都好體諒班公關大員，佢哋喺樂園工作，就好清楚迪士尼真係一個不明白香港做事文化嘅機構，事事大美國主義，成日諗埋啲行唔通嘅屎橋。
例如最近推出半年門票出嚟，就搞到前線員工農曆新年就要喺閘口抵擋班暴民般嘅入場客，結果咪又搞到班公關們新年流流急急搵阿頭出嚟解畫。
迪士尼出親事都咁難搞，公關部今年已經有兩名員工離職，Glendy今次咁勇，希望佢可以將海洋公園愈戰愈勇嘅智慧帶入迪士尼。
傳真︰2623-9278
電郵︰[email protected]