9樓D座：鍵盤打殘　借屍還魂　楔罅卡片座

早前抬部舊電腦去街邊檔回收，主機連芒套現$150，我問：「加多個Keyboard呢？」同樣$150，說到底都叫做搭多件豬頭骨，點知，分毫不值。或者，回收檔口阿姐嫌我個Keyboard甩掉幾粒無二手價；既然明蝕但自己又用不着個舊鍵盤，把心一橫將它拆粒，砌出一款表面同是鍵盤模樣，但實際可插卡的小擺設。

記者：招佩珊　攝影：林栢鈞

鍵盤拆粒砌佢
鍵盤罅楔卡Fit

鍵盤的損耗率大，輕則甩色無字，重則按極無反應，有個更嚴重的Case是一名打機Fans連按鍵都磨穿，然而，拿去回收一文不值，於是，移花接木在板上，同樣保持鍵盤的排列，但用途就轉為插卡片，最好有黑、白色鍵盤各一，可拼湊出黑白相間的花款。

材料

30×12cm木板1塊
鍵盤按鍵30-35粒

步驟

1.從鍵盤上撬出按鍵粒，16×10cm插卡範圍約需30至35粒。

2.將按鍵粒凸出的部份，用尖嘴鉗拔掉務求弄平按鍵粒底部。

3.用萬能膠將按鍵粒拼貼在木板上，待乾透後便可。

粒裝磁石貼1分鐘起貨

做完個卡片座還有按鍵粒用剩，零星幾粒數量有限，大可以將它改裝成磁石貼，而且做法超簡單，連黏連剪裁1分鐘完成1粒；另外，眼見拆散後的按鍵粒，忽然聯想到Scrabble這個串字遊戲，索性儲多3、4個鍵盤，實行DIY一副Scrabble，又或將按鍵拼成字串如「TO」、「FROM」來張貼留言，連寫字功夫也省掉。