歐洲接二連三爆發禽流感，香港散戶飼養家禽亦被禁止，不過始終無阻香港人對食雞嘅熱情。一般家庭都鍾意整白切雞，不過要雞整得好味唔嚡口，其實都有唔少蹺妙。
先浸90℃水
首先，千祈唔好用過滾嘅水浸雞，如果唔係雞就會好嚡，保持90℃左右嘅溫度就為之最好。點先至知水溫係90℃？唔使塞支溫度計落水嘅！當你見到煲水入面四邊冒起細小泡泡，就大約係90℃水溫喇！
不過，要留意雖然話浸住熱水，但雞表面同裏面嘅溫度其實有差距，單單咁浸，就會出現好多人遇過嘅問題，就係劏開隻雞，發現骨頭附近仍然有血水。想防止呢種情況出現，秘訣就係煮嘅時候間中要將隻雞抽起，等雞腹腔只有大概60℃嘅水流出，然後再放滾水再滾，重複以上步驟兩次左右就可以喇！
雞一離火即放冰水
最後秘訣過冷河，呢招好多人都識，但只限用水喉水，雞一拎出煲就會散發大量蒸氣，呢啲蒸氣其實即係雞嘅水份，蒸氣蒸發得愈快，雞嘅水份就會流失愈大，所以嘥少少時間預備一盤冰水，雞一離火就即時放入冰水鎖住水份，表層水份就會帶入雞身，肉汁會更加豐富唔嚡口！
