由於領匯（823）非常成功，搞到隻隻地產股都話要分拆REITs上市，而且傳親都股價例升，之前鷹君（041）係咁，近期恒地（012）亦一樣，噚日就輪到老虎仔隻遠東發展（035）。
經紀黃話，有分析員見過遠展，話佢哋考慮緊將旗下3、4星酒店分拆上市，可能係整間公司獨立上市，又或者以REITs形式上市都唔定，據講計劃仍係好初步，但遠展股價有理冇理先炒高，升4.62％，收3.40元，成交股數2609萬股，金額8856萬元。
其實遠展本身大把消息可炒，唔一定要炒拆REITs，淨係澳門地產概念已經有排講，但家陣市場流行呢樣嘢，一講親投資者就撲過身上去。
散戶芬佬怨聲載道
另外，昨日玖龍（2689）公布分配結果，小初個個朋友都話分得少。經紀黃話，唔好話散戶怨聲載道話分得少，其實芬佬亦完全唔夠貨，所以玖龍今日新登場，肯定成為全場焦點，無貨者如小初之流，可以坐定睇表演。
慕容小初