華華噚日喺兩份財經報章上，見到一個約6吋乘6吋嘅「嚴正聲明」，雞乸咁大隻字寫──胡野碧（圖）唔再係博大資本嘅員工，禁止佢進入寫字樓。爭在未寫內有惡犬。喂，博大係胡野碧02年搞嘅公司，無端端被禁入，唔慌好嘢啦。
大家應該記得01年年中，有間叫做杰威嘅包裝公司，因被告密信揭發誇大生意額上市，而被迫腰斬上市計劃，當時幫杰威做保薦人嘅，正是胡野碧打緊工嘅DBS。件事搞大咗，胡野碧半年後拜拜，然後開咗間博大，幫人搞上市同財務顧問。
博大一向低調，舊年只係同其他證券行夾份安排兩間公司上主板，胡野碧亦冇乜公開露面。不過，華華發現博大上個月突然改名，改為匯金博大，話唔定有新股東加入，舊人又要拜拜。坊間有個講法，話呢個嚴正聲明可能係要劃清界線，好向監管機構交代。華華希望今次唔係又搞單好似杰威咁「杰」嘅嘢啦。