投資產品五花八門，日日都有新嘢面世，就算係投資老手，都可能搞到頭暈，所以證監近幾年都擺咗唔少資源喺投資者教育工作上，噚日就為早前搞嘅「投資有你」故事比賽舉行頒獎禮，又搵嚟兩個DJ，將其中一個得獎故事講出嚟，講到七情上面（圖一）！
證監會歐陽長恩（圖二中）話，今次係第一次用故事比賽形式，推廣投資者教育，估唔到反應咁鬼好，收到成百份作品，當中唔少係真人真事，最後生嗰個參賽者只得19歲，年紀最大嗰位有79歲。梗係，用親身經歷寫成故事，其他投資者睇到容易有共鳴，點都好過一味說教咁悶蛋。
頒獎禮上，一眾評審都有講吓個人投資心得，都係你知我知嘅大道理，但華華覺得港交所郭志標（圖二左）最坦白，佢話呢個世界邊有咁多內幕消息，最實際就係同經紀傾多啲偈，大家收到未呀！