呢排散戶熱衷炒新股，即將掛牌的玖龍紙業（2689）熱爆全城，家陣大家講緊嘅，已經唔係會抽到幾多（因為肯定唔會多），而係掛牌首日究竟追唔追貨。
經紀黃話，江湖傳聞玖龍暗盤價去到4元樓上，但芬佬同散戶認購咁踴躍，加上同類股理文造紙（2314）企硬喺10元之上，如果首日見到玖龍喺4元樓下，有一定值博率。
玖龍暗盤4元樓上
另外，中盈控股（766）早排因主要股東減持股份畀德資行，股價一度急挫。昨日則似重整旗鼓再來，股價急升11.82％，收1.23元，成交股數6135萬股，金額7290萬元。經紀陳話，據講炒開中盈班炒家水頭充足，所以成交先至有咁強勁。
中盈計劃多多，不但話要搞瀝青業務，又話去新疆搞焦煤，樣樣都要大量資金投資，雖然早排已經抽過水，但家陣股價再炒高，順便抽埋水亦係好合理推測。
慕容小初