原定3月2日先派貨嘅NDSLite，估唔到日本有店舖偷步開賣，不過到港貨源極少，據聞全港只返到幾部，暫知灣仔及深水埗各只有一部，雖然官方定價只係千二蚊港紙，不過在物以罕為貴底下，NDSLite暗盤價炒上二千幾！某啲店舖更索性「封盤」，擺出嚟當ShowQualiy。記者有幸率先揸上手試玩，第一眼望落真係非常小巧，比舊型號縮細大概30%，放喺衫袋都唔怕「墜」住，而減輕重量令長時間煲Game都冇咁易攰，成部機畀人一種脫胎換骨嘅感覺！搞到筆者心思思重投NDS嘅懷抱。
至於屏幕亮度、兼容度甚至Playan嘅對應情況等，喺3月4日嘅《爆機狂迷》會有更深入嘅測試報告，敬請讀者留意。
記者：徐影龍
攝影：陳國輝