港股繼續調整，恒指收市跌100點，只要守穩在10日線（15714）之上，市勢應無大礙。噚日中段曾有一次反彈，恒指上番15887，只下跌30點，沽壓明顯不大，而成交亦縮到不足300億元。仲有，市勢調整，但上升股多過下跌股（都不計認股證），好多落後股接力而上。
國企已見轉穩，H指收6486，跌19點，噚日中段且曾一度倒升，相信個別類別股份會先後到底。噚日，內地地產股已率先反彈，兩大龍頭股中國海外（688）同華潤置地（1109）都有好表現，前者高收4.375元，升2.9%；後者最高搶到4.425元，收4.35元，升3.5%。其他如深圳控股（604）、越秀投資（123）、北辰（588）、新世界中國（917）同百仕達（1168）等，都逆市而升。
華潤置地已連升4日，但大行買盤仲係鍥而不捨，好多時仲係主動掃貨，過去1個月的圓底收集形態已完成，家吓開始發力，要到前高位4.65元先會有少許阻力，整固後再上，就可以望空衝刺。
第二波注資年中落實
噚日有消息，話華潤置地第二波嘅注資行動，年中就會落實。去年11月，公司獲大股東注入收租物業，股價隨即有脫胎換骨表現，理由係資產評估不斷提升，大行同基金全面看好。今年1月，華潤置地以每股作價3.725元，配售3億新股，貨源亦大部份由基金接晒。
公司注資，購入價較估值折讓35.73%，但大行報告認為部份物業的估值仍過低，有研究報告更憧憬未來會再以折讓價注入多個地產項目，令每股資產淨值高達5.80元。大行和基金在現水平仍大手吸納，不會無因。
內地地產股大偏低的，新世界中國係其一，噚日收3.50元，升1個位，比每股資產值6.18元大幅折讓43%，過去兩個多月，走勢形成大型三角形，現時走到三角形嘅尖端，若破位而上，升幅會好可觀，照度上去，可見4.80元。
安德利（8259）逆流而上，收0.75元，升2仙，配售所造成的壓力已消除，中線股價有機會重上1元水平。
郭兆誠