華人置業（127）主席細劉賣1.74億股（8.28%）畀TCI，每股8.33元，成為市場焦點。初時以為華置噚日可以復牌，點知仍要繼續停牌，原來公司要等埋另一名主要股東處理華置股份的通告。
據聞今次沽貨畀TCI唔止細劉，和黃（013）亦會減持3000萬股，令到TCI持有華置股權近10%。TCI一向無寶不落，華置復牌後有可能上升，但就應該唔會好似早前入股百仕達（1168）時急升44.5%咁癲，大家不宜過份憧憬。
黑客話，今次TCI是善意入股，並非敵意狙擊，而為市場所帶來的刺激，亦肯定冇早前入股領匯（823）及新世界（017）咁大。
內地又吹風話QDII快出台，但國企股只是個別發展，交行（3328）及建行（939）繼續被質，建行收3.60元，跌0.69%，高盛在3.60元有大量賣盤候沽。交行跌2.66%至4.575元。
晨訊大行接力唱好
晨訊（2000）早前獲里昂唱好，目標價2.60元，噚日股價大升9.18%至2.675元，即刻到位。原來花旗接力唱好晨訊，話睇2.80元，以噚日收市價計，上升空間不足5%，似乎值博率唔高。
不過Cookie話此股街貨疏，兼有大行睇場，如果股價繼續炒高，唔排除大行會跟住調高目標價。此股由1.24元低位炒上，累計升幅已逾1.1倍。
中芯有意借錢利淡
中芯（981）近期升至1.33元後反覆回落，跌至1.11元後又見異動，噚日升2.6%至1.18元。市傳公司計劃融資6-8億美元，呢個消息利淡多過利好，一旦利息太高，又或者冇人肯借錢畀佢，隨時會玩插水。
阿虎