今日是第76屆瑞士日內瓦車展舉行的大日子，原來福特車廠也趁這段時間，為旗下的Galaxy推出新一代型號，新車最大賣點並不是全新造型，而是廠方刻意營造的大車籠，實行要泵脹個車廂，等你可以坐得舒服啲咁話。
從廠方公布的數據可以看到，新一代Galaxy尺碼明顯增大，先有車長增加179mm至4820mm，闊度也由原來1794mm增至1854mm，可想而知車廂空間肯定大到你唔信。咁都算啦，原來廠方又在車上加入FoldFlatSystem，用家可輕鬆將中排和後排座椅在車廂內「消失」，徹底地成為一個載貨平台，容量即時由435公升暴增至2,325公升，擺甚麼進去也不是問題。與此同時，天窗你可選擇最啱曬月光的天幕式車頂，又或是像格仔餅一樣的天窗，中間更有儲物格，任你擺放不同雜物。引擎容積則為1.8公升至2.0公升，輸出數值100匹至145匹，用以驅動此車綽綽有餘。
記者：鄭達基