早兩日啱啱講完香港愛迪生，有老友講︰「你應該介紹吓世界上最大嘅科研公司，得香港人知道乜嘢先至係真正嘅高科技生意。」既然有咁嘅要求，利世民恭敬不如從命，就試下貼冷門，講一間叫做SAIC（ScienceApplicationsInternationalCorporation）。
相信香港唔係好多人聽過呢間SAIC，甚至乎有炒開美國股票嘅朋友都未必知呢間公司嘅存在。不過SAIC其實係一間2005年響紐約上市，去年有72億美金營業額嘅Fortune500企業。大家未聽過佢嘅大名，係因為佢哋客仔唔多，最主要嘅有美國國防部、國土安全部以及中央情報局……呢幾年幫SAIC搵最多錢嘅就係反恐設備。話說美國政府喺911之後，可以話杯弓蛇影，乜都驚得一大餐。SAIC就請咗一啲所謂「反恐專家」，為世界上最有影響力嘅學術期刊撰寫反恐文章，其中最強調嘅一點就係︰「𠵱家美國嘅反恐方法好落後，要大大改進先得。」美國政客見到呢啲論點，又自自然然要政府做啲嘢，包括向好似SAIC呢的高科技公司買最新嘅產品。
高科技結合古老政治
利世民特登講SAIC，因為佢哋已經進軍香港喇！出口到香港嘅反恐工具，唔係賣畀香港政府，老實講特區政府又邊有咁多仇家，又邊使擔心咁多呢？其實SAIC可以響香港有生意，最終仍然係拜美國政府所賜。
話說美國政府喺SAIC嘅游說之下，相信咗海運入境貨物係恐怖襲擊一大漏洞。一個同時係SAIC「顧問」嘅「反恐專家」就建議，美國政府要向世界各地政府「建議」，響各大貨櫃碼頭安裝X光及放射性探測器，對恐怖襲擊進行「源頭監控」。呢個建議表面上唔需要花費美國政府一分一毫，當然大受美國政客支持啦。香港係世界上最繁忙港口，自然係頭號目標！
香港貨櫃碼頭會為呢個「服務」從每個出口貨櫃收取20美金。表面上睇好似濕濕碎，不過以香港每年出口嘅貨櫃數目計，其實已經係上億美金收入，所以香港貨櫃碼頭當然大力支持美國政府。
SAIC「成功」之處在於識得將高科技混合政治。雖然人稱政治做「世界第二古老行業」，但連高科技公司最終都要靠政治開飯，如果唔係啲科技有幾厲害都英雄無用武之地。究竟呢啲高科技又有乜意義呢？
利世民