代理送定畀業主嘅例子，蘭西都寫過唔少，今次主角係美聯物業顧問饒海全同上司區域經理謝順輝，佢哋為促成大角嘴帝柏海灣成交，專程送定畀住喺澳門嘅業主。謝順輝知道有行家都會送定去，但唔知對方個價幾多，為免有閃失，搭船太慢心驚驚，重皮啲千三蚊一位搭直升機都要，時間就係金錢。 個單位係帝柏海灣二座高層一千零四呎，成交價近八百萬，比業主叫價八百萬低些少，呎價七千九左右。