陳欣欣因為做咗有線體育節目主持，而同有線足球評述員、著名填詞人潘源良拍拖，不過原來佢兩個最近分咗手，聽講係由欣欣提出。噚日欣欣同潘源良都有喺銅鑼灣出席有線世界盃宣傳活動，不過兩個喺現場完全冇兩句。
馮仁昭事後就打番電話問欣欣，佢承認同潘源良已經分咗手差唔多半年，分手原因係大家嘅諗法唔同。問欣欣分手嗰時係咪好難過？欣欣就話：「最難過係個心想分手，但又未開到口，不過之後已經冇晒事，𠵱家解決成件事，心情舒服好多。」
二人冇偈傾
欣欣話由第一日同潘源良拍拖，就知佢係一個唔會結婚嘅人，但耐咗就發覺佢唔係好想同自己講嘢，只係鍾意同朋友傾偈，所以要喺佢朋友口入面知男友嘅事。欣欣話咁樣好辛苦，今次決定分手，已經諗得好清楚，提分手之後潘源良都冇乜表示。欣欣又話雖然𠵱家有好多機會一齊做嘢，但唔會因為咁而尷尬。