經濟好轉，升職加薪消息不絕，好似地產界噚日就傳來喜訊，會豐德地產物業發展及營業董事黃光耀，擢升為會德豐地產董事，更上一層樓，成為董事會成員之一，成員包括主席李唯仁、周明權、吳梓源同徐耀祥。
喺美國威斯康辛州修讀工商管理嘅黃光耀，八九年一畢業就加入九龍倉做見習生，九二至九三年期間，幫手銷售新加坡嘅柏奧花園，當年嘅有線電視交易亦有份參與。
直至九七年，開始擔任賣樓工作，初試啼聲作品有大埔倚龍山莊同鑽石山星河明居，近年就有尖沙嘴擎天半島同深井碧堤半島，曝光率甚高，更被冠以「樓神」稱號。
會德豐地產又啱啱用兩億四千萬，買入西半山巴炳頓道同聖士提反里地皮，樓面地價五千一百蚊，由於地價都唔平，做中小型住宅冇肉食，所以集團打算重建發展成精品式豪宅，最快明年賣得。