地產代理行舊年賺到盤滿缽滿，今年大家都雄心萬丈，猛話要大開分行，增聘人手，搶市場佔有率。為推動前線，梗係唔少得擴大職權一招啦。 加入香港置業逾五年，舊年攞到區域董事業績大獎嘅助理營業董事曹仲康，公司委以重任，畀佢睇晒成個九龍區屋苑，可謂九龍皇帝，手下增至二十七組二百六十人，仲話今年會開多六間分行同請多六十人，又定咗三年大計，擴展東九龍一手市場。