華華早輪寫過，花旗環球金融亞洲區主席「番薯梁」梁伯韜辭職，佢上月底正式離任，呢位紅籌之父計劃自立門戶，成立私人投資基金繼續幫人搵銀，至於佢喺花旗負責開嘅中國業務，當時尚未有人頂替。噚日花旗就公布，搵咗普華永道（呢個係大陸叫法，香港叫做羅兵咸永道）中國區主管合夥人Albert吳港平過檔，出任中國區董事總經理，睇實檔投資銀行生意。
花旗搵個會計師做投資銀行部頭頭，表面睇有啲怪招，但諗深一層，呢啲位其實唔使真係落手落腳去做，佢主要嘅職責係搵生意。Albert其實喺內地工作好耐，90年代初已經開始長駐上海，以前喺安達信會計師行做中國主管合夥人，點知安達信牽涉入美國Enron事件，搞到被迫解體，香港同中國內地嘅安達信喺02年併入羅兵咸，當時就係由Albert負責簽賣身契。
其實國際會計師行由以前八大逐步兼併到𠵱家得番四大，有行內人話，通常每次兼併，被人併嗰間嘅夥計，都會有一段任職保證期，唔使即刻起身，但幾年之後就好難講。今次Albert離開，唔知同呢啲陰謀論有冇關係呢？
李華華