隔晚歐美股市唔掂，是日東京股市唔妥，港股冇運行，恒指跌100點。中移動（941）同滙控（005）總共拖低恒指70點，即係其他31隻成份股夾埋只係令恒指冇咗30點，小意思。
3月期指低水95點。正如昨日所計，滙控月尾前除息估計拖低恒指81點，再計入恒生（011）除息估計1.90元拖低12點，總共拖低93點，所以昨日期指實際只係低水2點。
國壽C輪2188：國內有聲氣QDII唔使好耐會推出，一旦成事，國內同胞買香港股，好自然會喺佢哋熟悉嘅股票埋手，至少炒家係咁諗法，於是國壽（2628）逆市一度搶上9.05元，埋單價8.85元，冇升跌。
QDII消息，可以炒一陣，揀國壽C輪玩一轉，2188諗得過，尤其係正股冇跌，隻輪無厘頭跌7%，更加抵博過其他。隻輪7月中到期，輪價1.79元，溢價1.6%，槓桿率4.9倍（有效4.2倍），引伸波幅33.1%。
國壽C輪4452：國壽C輪4452昨日叻過2188好多，收1.32元，上升8%，眾輪中升幅最大。
經過昨日變化後，2188靚過4452。點靚法，睇吓個表就清楚。
章盛