啲人成日都問我有乜菜好食，其實隻隻差唔多啦！不過有隻菜就長期好賣，就係西蘭花喇！入口夠爽，做涼拌定係熱食都得，好受啲師奶朋友歡迎㗎！
唔好放多過4日
嗱！揀西蘭花有秘訣㗎！如果攞上手輕飄飄咁就唔好買喇！靚嘅西蘭花一定要重身，個手感愈好，代表質量愈好。仲有呀！嗰啲花球硬邦邦嘅都唔好揀，硬即係話老，唔新鮮囉！西蘭花如果買咗返屋企最好快啲煮唔好擺咁耐啦！保鮮期最多四日咋！啲街坊嚟買餸諗唔到煮乜，我都會叫佢哋買西蘭花攞芝士焗，快手又好食嘛！再唔係西蘭花煮海鮮都好食㗎！煮蝦仁帶子就最夾！
含纖維質利通便
聽我啲細佬講西蘭花有豐富嘅胡蘿蔔素、維他命同礦物質，又有大量嘅鉀質同纖維質，啲細路仔去唔到廁所，食西蘭花有幫助㗎！唔好話細路，大人都有用喎！隔籬豬肉檔榮哥，日日過嚟買西蘭花煮畀佢老竇食㗎！話裏面鉀質對細胞裏面液體平衡有幫助，仲幫助心臟功能同維持血壓正常，佢老竇𠵱家八十幾歲喇！