在中共中央排名第六、主管金融政策的中共政治局常委兼國務院副總理黃菊（圖），自從1月16號參加咗中國銀監會會議後就冇再露面，有傳聞話，佢新春期間體檢驗出患有胰臟癌，之後就引發中共人事可能出現大調動嘅揣測。
噚日內地多家財經報章包括《上海證券報》、《證券時報》，「突然」刊登咗佢老哥一篇會議講話，令到大家以為佢病情好轉，等緊佢拍板嘅金融事務終於可以落實有期，內地股市仲逆亞洲區股市上升，其中上海綜合指數更加連升五日，衝破1300心理關口，升到接近一年高位㖭。
點不知睇真啲，原來呢篇係佢喺1月12號，全國證券期貨監管工作會議上嘅講話節錄，即係舊料一則，不過，兩會前突然有此一舉，都咪話唔耐人尋味。