禽流感在世界各地肆虐，令到人心惶惶。是情願交出還是監生搶也好，政府先上演無得賠之捉雞在家。唔係話白鴿眼，天賦異稟的信鴿總係令人覺得特別可惜！但無計，連貴冑級的法國鵝肝都話禁入口。好戲繼續，逾百人上街爭取散養禽鳥遊行、連農婦都話要興訟為小鵝討回公道……雞毛鴨血下偷生安樂窩的雞鴨家品，聊以慰藉同時暗起革命，續演抗禽流未完戲碼！
記者：趙善怡
攝影：譚盈傑
雞無寧日自錄晨鐘
日本TANITA雞鐘，可錄低最能喚醒你的醒神說話，如阿媽的吵耳叫聲或女友的溫馨耳語一一化為響鬧。
閃燈浴鴨
頭纏熱毛巾的浸浴游水鴨，會隨着水流發出「哇哇」聲及閃燈，有紅、綠兩色。同佢玩之前記住入鈕形電喎！
進駐廳堂雞鴨竇
「由朝到晚我都要伴着你！早上用溫柔的聲音喚醒你，晚上為你發光……只要你不嫌棄，我便心滿意足！」小雞小鴨的心底話。由是得寵進駐廳堂、睡房每一角落。
養鴨得草小盆栽
可以浮於水面的黃B鴨，今次在背位開窿諗住搞吓環保。附上化學泥及種子，要愛鴨一族畀心機栽種植物。種瓜雖然唔係得瓜，但養鴨得草都好過無！
扭計萬年曆
雖然要萬年曆Work，往往都要假手於人，天天要去執番個日子出來。不過，它的好處是唔使年年買日曆，咁年中就可慳番唔少啦！
多功能電話座
軟綿綿的黑雞電話座受盡各大日本美少女們的鍾愛。外形Cool到爆，除了可當電話座之餘，內裏更蘊藏薰衣草。將它擺放在房間內更可用來辟味，並有驅蟲的效果。
旅行良伴
32厘米闊乘30厘米長的布質雞形頭枕不特止睇得，在飛行或坐長途車的旅程中必然成為你的絕頂旅伴，平日在家或Office攰攰哋都好啱使。
黃色巨鴨吞廁紙
除咗可以將身高37厘米的GA-KO布料黃鴨平放之餘，其備有掛繩更方便作垂直擺放，夠晒慳位！這個黃鴨紙巾套適用於普通長形紙巾盒，紙巾從鴨肚拿出，非常盞鬼！
發聲噴火鴨
請不要看輕其鴨身細細定必冇乜作為！要入Gas的黃小鴨打火機，按下其尾部隨即發出「哇哇」聲之餘，也同時燃起一小炷熊熊火光！
肥雞嗒糖
Toy'sYard設計的豆雞眼糖果箱，雖然其身形肥胖，但先可發揮到其藏糖的功能。20厘米高的透明雞身可方便大家搜索所需，Cutie又實用！
夜盲救星
由PP樹脂製成的20厘米高GA-KO一觸式企身黃鴨燈，叉住條腰氣勢果然十足。只需要3粒2A電池，輕輕按一下它的腳，就可照亮睡房，方便晚上亮着找東西。
殺入廚廁㨘聲譽
通常大家見到的小鴨同小雞用品都是與浴室或廚房有關的。今次亦不例外，小雞同小鴨不想再被大家誤會佢哋帶菌兼鍾意污糟，要用實力去證明「我們也愛潔淨」！
啜實冇甩牙……刷
佢哋排排坐並不是想食粉果，而係要集中鴨力為你夾實啲牙刷。一排有5隻膠鴨的牙刷掛座共可擺放4支牙刷，一家四口啱啱可以放齊晒啦！
潔廁Duck
日本製的黃小鴨廁所刷連頭形膠料廁所刷筒，務必要貫徹黃小鴨的黃色傳統，打從廁刷柄到廁刷毛都要黃色。其耐熱度為80嵖，咁就不易變形啦！
安全防滑墊
黃小鴨好似家人般注意你的健康與安全！黃小鴨防滑墊底部有吸盤，啜實地下，唔怕你沖沖吓涼跣腳撻親條腰骨。共6片裝的防滑組合可謂夠晒貼心！
叫雞刷背
Mimi肥雞沖涼棉百分之一百Polyester製造。頭上有蝴蝶結的她非常之可愛動人。將手套入肥雞內，並在其身上唧上皂液，慢慢按摩身體，認真沖涼一樂也。
堅挺刷毛去污易
黃B鴨㨘完廁所唔怕累，仲要話刷埋個浴缸同洗手盆才可心息！用塑膠製的黃B鴨手刷，毛質夠晒堅挺不易變形，無懼頑強污迹，誓要將邋遢一一掃除。
防水收音醜小鴨
除了可以在浸浴時聽佢之外，防水淨身的黑鴨子也可擺放在睡房內。只要2粒3A電池，就能啟動其收音機功能，伴你進入夢鄉！
售賣點
（a）Bearinmind（23742376） 旺角潮流特區3樓302號舖
（b）city'super（25062888） 銅鑼灣時代廣場B1地庫
（c）e-Land（23699390） 銅鑼灣記利佐治街1號金百利商場3樓305號舖
（d）OLALA（31677907） 銅鑼灣記利佐治街1號金百利商場3樓319號舖
（e）VVshop（21368178） 旺角潮流特區1樓122號舖