富翁Ｐ自言擁資千萬，加上一層半山區千五呎舊樓，已經供滿，時值九百幾萬，咦，重有一份正工噃，年薪二百萬，五年後退休，可攞公積金近六百萬，子女已經大學畢業，居於英美，唔肯返嚟。
富翁Ｐ睇完左丁山講百萬富翁，條氣有啲唔順，同左丁山講：「我雖然冇五千萬淨資產者，都叫做富有噃，點解你夠膽講我呢一批人只算係小康，唔稱得上係富翁，我認為自己係噃！」冇錯，銀行啲財富管理都視富翁Ｐ為好客，碼到佢實，朋友亦都稱呼之為富翁Ｐ，主要原因係佢請食飯好疏爽！富翁Ｐ既然唔順氣，於是大家計吓數：五年後富翁Ｐ退休，層樓唔賣得，因佢兩公婆喜歡半山區夠威，身份唔同；既然唔賣得，層樓只係居所，唔會變成現銀。估計五年後佢嘅現銀（連以後五年儲蓄、投資所得）加加埋埋約係二千二百萬，兩公婆靠呢筆錢過老，唔夠使可以賣埋樓搬去新界區小單位，套現多幾百萬。
退咗休，當然唔夠膽亂咁炒國企，保本收息為上，以二千二百萬一年收息（最安全投資，美國十年期貨孳息率約4.6%），一年收番一百零一萬，買中電（二號）收息，一年可收（以目前派息推算）5.2%，得一百一十四萬，自然好過好多人，兩公婆使唔晒啩？攤開一個月有九萬五千幾，中產小康之家可以印印腳，但距離現在年薪二百萬嘅鬆動法，有啲距離嘅，要維持同樣收入，同樣生活水平，須擁資四千幾百萬！
兩公婆退休後有九萬五千幾一個月，幾生修到，可惜仍然冇資格同真正富翁比。一位富豪新貴喜歡坐國泰航空公司頭等艙來回倫敦，在周末購物睇戲，一次閒閒哋用十零萬，呢啲就叫做真正富翁嘞。雖然人比人比死人，但擁資一百萬、一千萬，真係唔好以為自己係富翁呀。國泰頭等機票一張已經要七萬三千四百元，兩張就十四萬六千八，比富翁P預計嘅每月退休收入多出五成四！滿意自己收入就得啦，認做富翁只會為自己增加心理壓力。