花𡃁Can：今季女牛王碧咸嫂　BootCutOut！直腳In！

今季女牛潮中，直腳款牛仔褲終於可以一洗多年烏氣，皆因一直讓BootCut款橫行多年的女牛壇，今季初現百「款」齊放嘅局面，多個新牌舊牌紛紛推出不同裁剪的靚牛，甚至連碧咸嫂為一向「女得緊要」嘅Rock&Republic所設計嘅牛仔褲，都有中性「英」一啲嘅直腳款式，可見BootCut款無得再橫行霸道。

記者：吳小明
攝影：陳盛臣
Model：Larissa@StarzPeople
MakeUp：ClaudyYuen@AtomicAttack
Hair：Clara@AtomicAttack

講到牛仔褲咁高深嘅學問，當然要向本地牛王Vicky請教，Vicky指一般女仔都以為着BootCut牛仔褲肯定可以令雙腿修長一點，呢點雖然無錯，但係就局限咗自己一世都只係揀BootCut款嚟着，其實其他款式一樣有竅門可依，以下三款由直腳、窄腳以至最惡搞嘅三個骨短度牛仔褲款都有教路，聽完書先去買包無死。

■BluesHeroes設計師VickyLam《壹本便利》圖片

Vicky話齋，直腳牛仔褲先天性剪裁「直畢甩」，經已照顧到唔同腿長嘅需要，其實好多牛牌喺剪裁方面做咗好多手腳，例如一般長褲的InnerSeam都會裁得較OuterSeam短，但當下好多牛仔褲嘅剪裁都會將兩者長度距離縮窄，着上後就會有拉長嘅視覺效果；其次是褲側的Seam位車線稍為向內縫，將Hip位收窄，亦會令整雙腿有拉長咗嘅錯覺。

■例如呢條看似無乜「符Fit」碧咸嫂Rock&Republic直腳牛，其實成條褲側的Seam位車線都向內移入少少，褲頭位尤其明顯，着上後對腳直過間尺。

■Evisu歐洲版洗水直腳牛，後幅釘上金色閃石M字，勁搶眼。$4,875（E）

講起窄腳磨白牛好多人都會耍手擰頭，因為好易聯想起好鬼八十年代嘅蘿蔔褲，上闊下窄着到成個短腳七咁唔驚就假；不過今季回歸嘅窄腳牛卻目標一致地玩全條窄，腳踏一對厚重嘅鬆糕鞋玩對比，最好稍為短少少露出腳踭的骨位令對腳睇落更幼，相反跟Vicky教路着長度超過自己腳長4、5吋以上的窄腳牛，由得褲腳「皺埋一箸」潮味更出。

■AntonioMarras雪紡背心$3,300（L）、RNA窄腳牛仔褲$1,290（R）、Chloe搭帶鬆糕鞋$5,060（L）

如果真係天生甲組腳如筆者嘅呢，呢段大可以Skip過唔睇，費事眼冤，皆因三個骨長度正是甲組腳宿敵，無謂勉強夾硬嚟。不過一般女仔小腿唔粗唔幼想試吓着三個骨，Vicky都有心得畀妳哋，大可揀一些外側有直間Stitching細節嘅款式，可以強調咗雙腿嘅筆直線條，都有助拉長雙腳嘅視覺效果㗎。

■呢條EVISU女裝三個骨牛的紅色Stitching咁搶眼，當然屬Vicky指的一類。未定價（E）

■RNA呢條洗水窄腳牛嘅蹺妙並唔係響褲腳位，反而是後袋，將後袋面積縮細並裁得貼近腰線位，穿上後就有Hip位提升嘅感覺，換言之即係對腳睇落長咗啦。（左：普通牛仔褲後袋設計、右：RNA牛仔褲）

■PradaDenim洗水四個骨直腳牛仔褲$3,150（L）

（B）Bauhaus （28823551）銅鑼灣金百利商場2-3號地下

（E）EVISU （22347266）中環ifcMall3097號舖

（L）LaneCrawford （21183388）中環ifcMallPodium3

（R）RNAMedia （27351322）尖沙嘴新太陽廣場地庫B01A舖

花𡃁Can：今季女牛王碧咸嫂 BootCutOut！直腳In！

花𡃁Can：今季女牛王碧咸嫂　BootCutOut！直腳In！