有智能居屋之稱嘅將軍澳寶盈花園，日前錄得首宗自由市場成交，係八座高層G室，面積五百六十八呎，成交一百六十萬，呎價二千八百一十七蚊，拍得住同區嘅私樓慧安園同富麗花園。
買家住港島區，嚟呢區探朋友，覺得區內居住環境唔錯，於是順便搵埋樓，一個禮拜就搞掂，買咗件寶盈花園自由市場貨。呢個單位因係銀主盤至有咁平，否則要百八萬至有交易。
寶盈花園入伙四年，係政府解禁准許五年內居屋可自由買賣下嘅受惠者。原業主九八年購入價九十八萬，後尾淪為銀主盤。
世紀21董事鄺志輝表示，寶盈花園設有泳池同燒烤場，所以好多人鍾意，𠵱家市場共有一百個放盤，居屋第二市場一個月平均有五至八宗成交，以六百九十二呎大單位計，一般要百五萬。
電郵地址：[email protected]