喺○四年十一月病逝嘅一代鬼才黃霑，生前花咗六年時間寫咗篇關於香港樂壇變化嘅博士論文《粵語流行歌曲的發展與興衰：香港流行音樂文化》。喺霑叔生前，一直有唔少人斟佢將論文出書，但霑叔過咗身，出書件事好似冇晒下文，不過馮仁昭收到風，霑叔呢本書唔單止會喺月內推出，而且香港電台電視部，仲會根據霑叔呢篇論文嚟製作一個關於香港樂壇變遷嘅特輯㖭。
無綫下月播
港台電視部節目總監倪秉郎噚日話：「我哋唔係製作黃霑嘅特輯，而係借霑叔呢篇論文作切入點，介紹香港樂壇嘅變遷，用唔同角度去睇樂壇發展，我哋請咗曾經教過霑叔嘅吳俊雄博士做節目顧問，黃志淙做主持，聯絡咗嘅嘉賓就有顧嘉煇、張耀榮、仙杜拉、黃耀明同李進等等，預計製作兩集半小時嘅節目，大概下個月喺無綫播出。」