早前御泰金融（555）勁升，近日又輪到名字相似的御泰國際（155）異動，但此御泰同彼御泰已經冇乜關係。御泰國際早排變身搞太陽能生意，公司將改名做華基光電能源。
御泰國際昨日升14.93％，收0.385元，係52周高位，成交股數1.32億股，金額4813萬元。
經紀陳話，有人諗住家陣油價高企，再生能源呢門生意有諗頭，所以趁機炒作。據講有關人士最近頻頻與證券界會面，大力推銷，而股價升勢亦明顯轉急。
創科一沉百踩
另外，前基金愛股創科實業（669），昨日表現甚為肉酸，最低跌至13.20元，又創52周低位，收13.45元，跌1.83％，成交股數1700萬股，金額2.3億元。
經紀黃話，芬佬其實同散戶一樣，都有羊群心理，創科呢輪一沉百踩，而芬佬對創科最新嘅疑慮，就係負債水平偏高，至於實際情況，則要等4月初公布業績時，先至睇得清楚。
慕容小初