港股噚日一開波就被嘜低，全日收報15918，跌31點，成交仍有345.43億元。
新股天業節水（8280）首日掛牌，一開市就嘜高報2元，但其後股價反覆回軟，全日收1.55元，仍較配股價1.18元，高出31%，成交金額有8828萬，唔算太亁，不過就予人一個抽高派貨感覺。以噚日平均成交價1.714元計，入市接貨者賬面要蝕近一成。
日前遭荷銀叫減持的建行（939），噚日再有大摩唱淡，目標價3.03元，股價一度大跌5%至3.50元，但低位有強大買盤支持，最後只跌1.3%，收3.625元。
話晒建行是目前唯一全流通的H股（最近傳出中行想有樣學樣，但受到內地政治因素阻撓，日後國企想以全流通H股來港上市，可能唔係咁容易），8月可望納入為恒指成份股，建行有個「藍色」保護罩，加上貨源歸邊，要大手質低唔係咁易。
交行（3328）噚日震咗唔少散戶嘅貨出街，投資者見佢未跌定，唔敢胡亂入市接貨，全日跌3.1%至4.70元。交行現時只較高位5.20元調整唔夠1成，相對於2.50元招股價，仍升近9成，只是大漲小回。
銅價跌買德昌
期銅價格下滑，受惠者要數德昌電機（179），因為生產馬達要用好多銅線。
德昌自高位調整，在7.30元水平已橫行一段時間，噚日大市作出調整，佢倒升0.66%，收7.60元。如果銅價轉勢向下，德昌不失為博反彈之選。
奕達（2662）去年12月以2.30元招股上市，初時受到股權訴訟影響，股價表現牛皮，其後步步高升，噚日創3.625元新高，收3.525元，升3.7%。
黑客話，此股幕後玩法似足富士康（2038），可能有動作跟尾。
阿虎