我賣鹹魚賣咗幾十年，知道鹹魚雖然膽固醇高，但好多人鍾意買嚟蒸肉餅，貪佢夠香口嘛！基本上馬友、紅魚、鰽白都可以用嚟做鹹魚，而嚟自孟加拉嘅鹹魚就最靚喇！
桶醃味較濃
揀鹹魚最緊要揀面層有光澤，而鹹魚又分霉香同實肉兩種，霉香就係將新鮮魚直接放入鹽桶密封醃1至2日，等佢變質同發酵之後，再加鹽醃多1星期，然後曬乾，食落味道會濃啲，肉質鬆軟帶鹹香；至於實肉就係將鹽搽上鮮魚身之後曬乾，毋須發酵，肉質結實，味道亦都無咁鹹但帶鮮味。
番茄抑制亞硝胺
不過，鹹魚醃製過程會產生致癌物質「亞硝胺」（臘肉、香腸、火腿呢類食物都會有），增加患鼻咽癌、食道癌、胃癌、腸癌、肝癌等等同消化系統有關嘅癌症機會。專家話，如果真係無鹹魚不歡，除咗減少食嘅次數，可以食多啲含維生素C嘅蔬菜，例如橙、青菜、山楂、番茄，既可以提高免疫力，又可以阻止亞硝胺嘅形成，記住喇！